پەڕلەمانی ئینگلیز، بۆ لێكۆڵینەوە لە كیمیاییبارانی هەڵەبجە، داوای ناردنی لیژنەیەك لە نەتەوە یەكگرتووەكان دەكات.

ڕۆژنامە: جمهوری ئیسلامی        

 ژمارە: 2558   ساڵی نۆیەم

ڕۆژ و بەروار: شەممە، 6 فەروەردین 1367  (26/ 3/ 1988)

 لاپەڕە، 3

 لەندەن: هەواڵنێری جمهوری ئیسلامی: گروپێكی پەڕلەمانی ئینگلیز داوا لە سەرۆكی نەتەوە یەكگرتووەكان دەكەن كە بە مەبەستی لێكۆڵینەوە لە هێرشە ئاسمانییەكانی عێراق بۆسەر شاری هەڵەبجە، لیژنەیەكی پسپۆڕ ڕەوانەی هەڵەبجە بكات.

ئن كلاد، ئەندامی پەڕلەمانی ئینگلیز و سەرۆكی لیژنەی بەگژداچوونەوەی سەركوتكاری و پشتیوانی مافی دیموكوراسی لە عێراق، لە تەلگرافێكیدا داوا لە خاویر دیكوئیار دەكات كە داوا لە رژێمی عێراق بكات كە بەزوترین كات دەست لە هێرشی كیمیایی هەڵگرێت.

لیژنەیەك كە بە (كادری) ناسراوە، كە 44 ئەندامی پەڕلەمانی ئینگلیز و 4 ئەندامی ئینگلیزی پەڕلەمانی ئەوروپا تیایدا ئەندامن، لە بەیاننامەی خۆیاندا بەتوندی هێرشی كیمیای سەر هەڵەبجە ئیدانە دەكەن و بەپێی بەیاننامەكەدا كە ڕژێمی سەدام یەكەمین ڕژێمە كە چەكی كیمیاوی بەرامبەر گەلەكەی خۆی بەكارهێناوە.

تیایدا هاتووە كە ڕژێمی عێراق ئەوەی سەلماند كە ڕەچاوی هیچیەك لەو بەڵێننامە نێودەوڵەتیانە ناكات كە واژۆی كردوون و ئامادەیە دەست بۆ خراپترین تاوانی دژەمرۆڤایەتی ببات و دوچاری ناشیرینترین تاوانی جەنگی ببێت.

هەروەها كادری خوازیاری داخستنی كارخانەكانی دروستكردنی چەكی كیمیاوی و بایلۆجی بوو كە دەكەونە سامەڕا و سەلمان پاك و شارێكی دیكە. ئەم لیژنەیە داوا لە خەڵكانی دونیا دەكات كە ئیدانەی هێرشە كیمیاویەكانی عێراق بكەن و داوای لە كۆمەڵگەی پزیشكی نێودەوڵەتی دەكات كە پیداویستی پێویست بۆ ڕزگار كردنی گیانی بەركەوتووانی هێرشەكیمیاویەكانی عێراق ئامادە بكەن.

 

ئامادەكردن و وەرگێڕانی: م. ی. اركان احمد حسن (جاف)